अब संविधान जारी गर्न विश्वका कुनै पनि शक्तिले रोक्न नसक्ने

काठमाडौं, भदौ ३० । एकीकृत नेकपा माओवादीका अध्यक्ष पुष्पकमल दाहालले अब संविधान जारी गर्न विश्वका कुनै पनि शक्तिले रोक्न नसक्ने बताएका छन् ।

एमाओवादी नेता पोष्टबहादुर बोगटीको प्रथम वार्षिकीका अवसरमा बुधबार पार्टी मूख्यालयमा आयोजित श्रद्धाञ्जली कार्यक्रमलाई सम्बोधन गर्दै अध्यक्ष दाहालले संविधानसभाबाट संविधान बनाउने विषय सामान्य प्रक्रियामात्र नभई पार्टीकै मिसन भएको बताए । उनले पार्टीले भनेजस्तो संविधान नआए पनि यो मिसन सफल पार्न सबैसँग आग्रहसमेत गरे ।

दाहालले पहिलो संविधानसभाभन्दा दोस्रो संविधानसभामा पार्टीको हैसियत कम रहे पनि धेरै माग राख्न खोज्दा प्राप्त उपलब्धि पनि गुम्न सक्ने खतरा देखिएकाले आफूहरु सहमतिमा आएको बताए । उनले एकीकृत माओवादीभित्र धेरै समस्या रहेको भन्दै संविधान जारी भएपछि पार्टी एकीकरण र सुदृढ पार्ने अभियान सञ्चालन गर्ने जानकारी दिए ।