राजेन्द्र महत्तोले आन्दोलन झन् चर्काउने चेतावनी दिए

वीरगन्ज, भदौ १५ । सद्भावना पार्टीका अध्यक्ष राजेन्द्र महत्तोले सरकारले तराईको आन्दोलनमा दमन जारी राखे आन्दोलन झन् चर्काउने चेतावनी दिएका छन  ।

मंगलबार नारायणी उपक्षेत्रीय अस्पताल बीरगञ्जमा सोमबार प्रहरीको गोली लागेर मृत्यु भएका दीलिप चौरसियाको परिवारलाई भेट गर्दै महतोले सरकारले तत्काल आफ्नो व्यवहार नधुसारे वार्ता समेत नहुने बताएका छन् ।

उनले मधेशका सबै जनता सडकमा ओर्लने र त्यसलाई सरकारले रोक्न नसक्ने समेत चेतावनी दिए ।

उनीसंगै रहेका उपाध्यक्ष लक्ष्मणलाल कर्णले मृतक चौरसियालाई शहीद घोषणा र क्षतिपूर्तिको पहल भईसकेको जानकारी दिए ।

संयुक्त मधेशी मोर्चाले आह्वान गरेको तराई बन्द आज १८ औं दिन

बारा, भदौ १५ । बाराको कलैयामा पनि स्थानीय प्रशासनले निषेधाज्ञा जारी गरे पनि तनाव भने कायमै छ|कलैयामा अहिले बाक्लो संख्यामा सुरक्षाकर्मी तैनाथ अवस्थामा रहेका छन् । आन्दोलनकारीहरुले बिहानैदेखि कलैयाका चोकमा बसेर प्रदर्शन सुरु गरेका छन् । बाराको भरतचोकमा पनि आन्दोलनकारी लाठीसहित बिहानैदेखि प्रदर्शनमा उत्रिएका छन् । उता, संयुक्त मधेशी मोर्चाले आह्वान गरेको तराई बन्द आज १८ औं दिनमा पुगेको छ । बन्दका कारण सिरहा, सप्तरी, धनुषा, महोत्तरी, सर्लाही, रौतहट, बारा र पर्साको जनजीवन प्रभावित बन्दै आएको छ । आन्दोलनका क्रममा दिनहुँ हुने प्रदर्शन र बन्दले गर्दा यि जिल्लामा यातायातको साथै कलकारखाना, बजार, शैक्षिक संस्थाहरु समेत ठप्प बनेका छन् ।