संयुक्त मधेसी मोर्चाले आव्हान गरेको मधेस बन्दको क्रममा मंगलबार बिहान सप्तरीको भारदहमा प्रहरी र आन्दोलकारीबीच झडपमा प्रहरीले गोली चलाउँदा एक जनाको ज्यान गएको छ। प्रहरीको गोलीबाट भारदह-१ का ३५ वर्षीय राजीव राउतको मृत्यु भएको छ।
प्रहरीको गोली लागि दर्जन बढी प्रदर्शनकारी घाइते भएका छन्। बिहानदेखि तनावपूर्ण रहेको भारदहमा प्रदर्शनकारी र प्रहरीबीचको झडपले उग्र रूप लिएपछि प्रहरीले गोली चलाएको स्थानीय प्रशासनले जनाएको छ।
प्रहरीको गोली लागि स्थानीय दीपक साह, देवनारायण विश्वासलगायत घाइते भएका छन्। अत्यन्तै चिन्ताजनक स्थिति रहेको उनीहरूलाई उपचारका लागि विराटनगर लगिएको स्थानीयबासीले जनाएका छन्।
यसैबीच प्रदर्शकारीले भारदहमा रहेको ट्राफिक प्रहरीको बिट तोडफोड र आगजनी गरेका छन्। झडपमा प्रहरीले २ दर्जन राउन्ड हवाई फायर गर्नुका साथै ३५ सेल अश्रुग्याँस प्रहार गरेको छ
