अझै पनि इन्धन बोकेका गाडी भित्रिएनन्

सोमबार पनि भारतसँग जोडिएका मुख्य नाकाबाट पेट्रोलियम पदार्थ भित्रन सकेको छैन।  हिजोदेखि नै सुचारु रहेको नेपालगञ्जको रुपडिया नाकामा सोमबार बिहान १२ बजेसम्म ४० ओटा गाडी भित्रिएका छन्। तर त्यसमा इन्धन भएका गाडीहरु छैनन्। भन्सार कार्यलयले भारततिर २८ पेट्रोलियम  र छ वटा बुलेट ग्याँस बोकेका गाडी कस्टम क्लियरको प्रक्रियामा रहेकाले साँझसम्म ती गाडी नेपाल भित्रने बताएको छ। 

 

उता पूर्वको काकँडभिट्टा नाकामा पहिलेको भन्दा सोमबार चहलपहल बढेपनि इन्धन बोकेका गाडी धेरै आएका छैनन्।  मेची भन्सार कार्यालयका प्रमुख भीमप्रसाद अधिकारीका अनुसार सोमबार १२ बजेसम्म ५६ वटा मालबाहक गाडी नेपाल प्रवेश गरेका छन्। तिमध्ये २ वटा ग्याँस बुलेट रहेका छन्। 

 

विराटनगरको जोगबनी नाका सामान्य भएपनि इन्धन भित्रन नसकेको  रानी भन्सार कार्यालयका प्रमुख कृष्ण बस्नेतले जनाएका छन्। ‘हामीले पनि यताबाट केही खाली गाडी पठाएका छौं, उताबाट पनि खाली गाडी आएका छन्‘ बस्नेतले भने ‘आन्दोलनकारीले भारतीय भूमितिर अवरोध गर्न खोजपछि उतातिर तनाव भइरहेको छ।‘ हिजो नेपाल र भारतका अधिकारीबीच भएको वार्तामा नाकामा धर्ना बसेर अवरोध गर्नेलाई दुवै पक्षले हटाउने सहमति भएको पनि उनले बताए। 

 

सुनौलीको बेहलिया नाकामा सोमबार मधेसी मोर्चाको धर्ना नभएपनि मालबाहक गाडी भने आउन सकेका छैनन्। इलाका प्रहरी कार्यालय बेहलियाका प्रहरी निरीक्षक रविनबाबु रेग्मीका अनुसार हिजोसम्म सर्वसाधारणलाई समेत सुनौली जान रोक लगाएइकोमा आजबाट सर्वसाधारण सुनौली गएर किनमेल गरिरहेका छन्। नेपालबाट केही ट्याक्टरहरु दुर्गाको मुर्ति ल्याउन भारततिर गएका छन्। सो नाकाबाट इन्धन बोकेका गाडी आउने क्रममा पनि छैनन्। 

 

मधेसवादी दलले हिजो प्रधानमन्त्री चुनावमा मतदान गरेको र भारतीय प्रधानमन्त्री नरेन्द्र मोदीले नवनिवार्चित प्रधानमन्त्री केपी शर्मा ओलीलाई बधाई दिएकाले सोमबारदेखि पेट्रोलियम पदार्थ धेरैमात्रामा भित्रन सक्ने अपेक्षा गरिएको थियो।

 

नवनिर्वाचित प्रधानमन्त्री ओलीका ६ प्राथमिकता

1.संविधान कार्यान्वयन

2.भूकम्पपछिको पुनर्निर्माण

3.पछिल्लो समयमा देखिएका समस्या समाधान

4.नाकाबन्दीको सहजीकरण

5.समृद्धितर्फको यात्रा

6.सबैसँग मिलेर अगाडि बढ्ने

काठमाडौं : नवनिर्वाचित प्रधानमन्त्री केपी शर्मा ओलीले छिट्टै मन्त्रिपरिषद् विस्तार गरी शान्ति, सुव्यवस्थासँगै विभिन्न रचनात्मक कामका साथ मुलुकलाई अगाडि बढाउने प्रतिबद्धता व्यक्त गरेका छन् । सबै पक्षलाई साथ लिएर अगाडि बढ्ने चाहना व्यक्त गर्दै ओलीले मुलुकमा देखिएका केही चुनौतीको सामना गरेर अगाडि बढ्ने पनि बताए ।

 

संविधानको कार्यान्वयन, भूकम्पबाट भएको क्षतिको पुनर्निर्माण, विभिन्न ठाउँमा देखापरेका समस्या समाधान, नाकाबन्दीको कारण भइरहेको असहज स्थितिको सहजीकरण, विकास निर्माणलाई अगाडि बढाएर समृद्धितर्फको यात्रा तीव्रताका साथ अगाडि बढाउने, सबैसँग मिलेर सबैको साथ र समर्थन जुटाएर अगाडि बढ्ने विषयलाई आफूले प्राथमिकताको सूचीमा राखेको ओलीले बताए । ‘शान्ति सुव्यवस्थासँगै विभिन्न रचनात्मक कामका साथ मुलुकलाई अगाडि बढाउन मेरो ध्यान हुनेछ । सबैको सहयोगको अपेक्षा पनि गरेको छु ।

 

 सबैलाई साथ लिएर जाने चाहन्छु,’ प्रधानमन्त्री निर्वाचित भएलगत्तै ओलीले पत्रकारसँग भने, ‘केही अप्ठ्यारा देखिएका छन् । ती धेरै महŒवपूर्ण छैनन् । तिनलाई पूरा गर्न सकिन्छ ।’ एमाओवादी र राप्रपा नेपालसहित १६ वटा पार्टीले गरेको समर्थनका आधारमा आफू निर्वाचित भएको उल्लेख गर्दै ओलीले भने, ‘यस जिम्मेवारीलाई मैले अवसर, सम्मान र चुनौतीका रूपमा लिएको छु ।’

 

ओलीसँग प्रधानमन्त्री निर्वाचनमा प्रतिस्पर्धा गरेका नेपाली कांग्रेसका सभापति सुशील कोइरालाले जिम्मेवार प्रतिपक्षको भूमिका निर्वाह गर्दै राष्ट्रिय समस्या समाधान गर्न लागिपर्ने धारणा व्यक्त गरे । ‘नयाँ प्रधानमन्त्रीलाई हाम्रो सहयोग हुन्छ । 

 

मुलुकमा शान्ति, स्थायित्व, लोकतन्त्र र विकासका निम्ति नेपाली कांग्रेसले त्याग गरेको हो,’ कोइरालाले पत्रकारसँग भने, ‘राष्ट्रियता, प्रजातन्त्र र समाजवादका निम्ति हामी उभिएका हौं । त्यसमा हामी सधैं प्रतिबद्ध रहन्छौं ।’ कोइरालाले १६ बुँदे सहमति हुँदा ओलीलाई प्रधानमन्त्री बनाउने भद्र सहमति नभएको दाबी दोहोर्‍याए । नाकाबन्दी, भूकम्प, तराईमधेससहित राष्ट्रिय समस्या समाधान गर्न आफूहरूले जिम्मेवार प्रतिपक्षको भूमिका निर्वाह गर्ने उपसभापति रामचन्द्र पौडेलले बताए ।

 

ओलीलाई प्रधानमन्त्री बनाउन प्रस्तावक बनेका एमाओवादी अध्यक्ष पुष्पकमल दाहालले राष्ट्रिय समस्या समाधान गर्न कांग्रेससहित सबै शक्ति मिलेर अगाडि बढ्नुपर्ने बताए । ‘यस्तो परिस्थितिमा प्रमुख शक्तिहरू एक ठाउँमा उभिनुपर्छ भन्ने थियो । कांग्रेससमेत प्रमुख राजनीतिक शक्तिहरू एक ठाउँमा उभिएर सरकारमा बसी संविधान संशोधनलगायत ऐनकानुन परिमार्जन गर्नुपर्ने थियो । अन्तिम समयसम्म हामीले हाम्रा तर्फबाट त्यस विषयमा पहल र प्रयत्न गर्‍यौं । 

 

मलाई दुःख छ, हाम्रो तर्फबाट धेरै मेहनत भएर पनि कताकता यो विभाजनको स्थिति आयो,’ दाहालले पत्रकारसँग भने, ‘यतिबेला यो विभाजन नेपालको आवश्यकता होइन । यद्यपि लोकतान्त्रिक प्रक्रियामा निर्वाचन हुनु सामान्य प्रक्रिया हो । जितहार हुन्छ । यसलाई सामान्य रूपमा लिएर राष्ट्रिय मुद्दामा कांग्रेससहित सबै शक्तिहरू एक ठाउँमा उभिनुपर्छ । 

 

राष्ट्रिय मुद्दामा एकता कायम गरेर शान्ति, स्थिरता र विकासतिर लैजाने मेरो प्रतिज्ञा छ ।’ दाहालले राष्ट्रपति निर्वाचनका बारेमा नयाँ शिराबाट छलफल गरिने पनि बताए । ‘राष्ट्रपतिका विषयमा अहिले छलफल भएको छैन । प्रधानमन्त्री र राष्ट्रपतिमा हाम्रो दाबी छैन भनेर हामीले पहिलेदेखि भनेका छौं । तर अहिले नयाँ परिस्थिति बनेको छ । यो परिस्थितिमा नयाँ शिराबाट कुरा हुन्छ,’ दाहालले भने ।

- 

नवनिर्वाचित प्रधानमन्त्री केपी ओलीबारे जान्नु पर्ने ८ कुरा

आश्विन २४, २०७२- 
नेकपा एमालेका अध्यक्ष केपी शर्मा ओली व्यवस्थापिका संसदबाट ३ सय ३८ मत प्राप्त गरेर २४ असोज ०७२ मा मुलुकको ३८ औं प्रधानमन्त्री निर्वाचित भएका छन् । नवनिर्वाचित प्रधानमन्त्री ओलीबारे जान्नै पर्ने १० तथ्य ।

(एक)
झापाबाट इलाम जेल सार्ने बहानामा २१ फागुन ०२९ मा सुखानी जंगलमा लगेर हत्या गरिएका पाँच सहिदमध्येका एक रामनाथ दाहालले ओलीलाई ६ कक्षादेखि आफ्नो घर चारपानेमा ल्याएर अध्ययन गराएका थिए । दाहालकै सामिप्यतामा आएपछि ओली वाम आन्दोलनप्रति आकर्षित भएका थिए । किनभने तेह्रथुमबाट झापा नझर्दै दाहाल कम्युनिष्ट आन्दोलनप्रति झुकाव राख्ने भइसकेका थिए । उनै दाहालले ओलीलाई आफ्नो घरमा राखेर पढाउदै कम्युनिष्ट आन्दोलनमा आवद्ध गराएका थिए । 

मंसिर ०२९ मा दाहाल पक्राउ पर्ने क्रममा ओली संयोगले मात्र जोगिएका थिए । दाहालसँगै पक्राउ परेका हुन्थे भने ओली पनि सायद उनीहरुसँगै सुखानी जंगलमा मारिन सक्थे । पक्राउ पर्नु चारदिन अघि मात्र दाहालसँगै ओली पनि भुमिगत भएका थिए र त्यसदिन घुम्दै घर नजिक पुगेका थिए । आफ्नो घरमा मानिसहरुको हुल देखेपछि उनले ओलीलाई तिमी यही बस्दै गर । म घरमा के भएछ हेरेर आउँछु भन्दै गएका थिए । घर पुगे लगत्तै उनी पक्राउ परे । यो दृश्य देखेपछि ओली भने प्रहरीबाट जोगिए ।

(दुई)

०२८ सालमा एसएलसी दिएपछि झापाकै चारपानेस्थित प्राथमिक विद्यालयमा उनी केही समय अस्थाई शिक्षक भए । यही क्रममा राजनीतिप्रति उनको झुकाव कसिलो हुँदै गयो र कम्युनिष्ट पार्टीको सदस्यता लिदै भुमिगत यात्रातिर अघि बढे । शिक्षक छाडेर आन्दोलनमा होमिएकै कारण उनको औपचारिक शिक्षा एसएलसीभन्दा अगाडि बढ्न सकेन ।

(तीन)

भुमिगत, १४ बर्ष जेल र रिहा भएर लुम्बिनी अञ्चलको जिम्मेवारी लिउन्जेल ओलीको छद्म नाम ‘उत्तम’ थियो । ओलीले नेपालका ७५ वटै जिल्लाको भ्रमण गरेका छन् । 

(चार)
विद्यालय तहमा पढदैदेखि ओलीलाई सहकर्मीहरु ‘जिब्रो धेरै चलाउने, जिउ नचलाउने’ भन्ने गर्दथे । त्यसबेलैदेखि ओली कतिसम्म बाठा थिए भने पोष्टर, पम्प्लेटहरु टास्नु पर्दा सहकर्मीहरुलाई यहाँ टाँस्, उहाँ टाँस भनेर खटाउँथे । आफैं परिचालित हुन्नथे । तर, सम्वन्धित निकायमा मैले टाँसे भनेर रिर्पोटिङ गर्दथे ।

(पाँच)
ओलीले कार्तिक ०२९ देखि फागुन ०२९ सम्म झापा बिद्रोहको दोस्रो सचिवको जिम्मेवारी पाएका थिए । झापा विद्रोहका पहिलो सचिव राधाकृष्ण मैनाली क्षयरोगले सख्त भएर थलिएपछि हर्क खड्का, सिपी मैनालीलगायतको मिलोमतोमा ओलीलाई सचिव बनाइएको थियो । तर, त्यस अवधीमा उनले एउटा पनि बैठक राख्न नसकेपछि फागुनको दोस्रो साता ओलीलाई हटाएर सिपी मैनालीलाई तेस्रो सचिव बनाइएको थियो । 

(छ)

२१ फागुन ०२९ को सुखानी हत्या काण्डपछि ओली झापा बिद्रोहका अर्का अगुवा मोहनचन्द्र अधिकारीलाई खोज्दै विराटनगर आएका थिए । त्यहाँ उनले अधिकारी भारतको गोरखपुर पुगेको जानकारी पाए । यसपछि ओली उनलाई खोज्दै गोरखपुर नै पुगे । गोरखपुर पुग्दा अधिकारी कानपुरमा रहेको सुँइको पाए । ओली पनि कानपुर नै पुगे । उखु बारीमा काम गरेर दुृवै जना केही समय कानपुरमै बसे । यसपछि त्यहाँबाट नेपाल फर्कने क्रममा २३ असोज ०३० मा ओली र अधिकारी दुवै जना रौतहटबाट पक्राउ परे । त्यसपछि उनी एकै चोटी असार ०४४ मा मात्र जेलबाट रिहा भए । 

(सात) 
०३२/०३३ मा ओली, अधिकारी र २० साउन ०३० मा झापाबाटै पक्राउ परेका राधाकृष्ण मैनालीलाई तत्कालिन सरकारले केन्द्रीय कारागारको गोलघर भित्र थुनेको थियो । गोलघरभित्र रहेको बेला ओली आन्द्राको अल्सर र क्षयरोगबाट  सख्त भएका थिए । त्यसबेला उनलाई दिसा–पिसाबमा जान समेत अरुको सहारा चाहिन्थ्यो । उनलाई राधाकृष्ण मैनालीले स्याहार सुसार गरेर बचाएका थिए । 

(आठ) 
जानकारहरुका अनुसार ०५४ को महाकाली सन्धी अघिसम्म ओलीमा राष्ट्रवादी सोच हावी थियो ।  महाकाली सन्धीसँगै दक्षिणी छिमेकीलाई रिझाएर सत्तामा पुग्ने बाटोमा लागे । उनलाई दक्षिण छिमेकीको सामिप्यतामा पुर्‍याउने काम माधव नेपालले गरेका थिए । त्यसको १८ वर्ष पछि मुलुकको ३८ औं प्रधानमन्त्री निर्वाचित भए ।

"बर्ढनी ईन्डियामा नेपाली नम्बर पेलेटका मोटरसाईकल हरूलाई पैट्रोल डिजेलमा रोक"

     २४ असोज २०७२ , भारतीय सरकारले अघोसित नाकाबंदी त लगाएकै थिए तर अब भारतीय जनताले सो नकबंदीको भरपूर फ़ायदा उठाएका छन| भारतीय जनताले अब नेपाली नम्बर पेलेटका मोटरसाईकल हरूलाई पैट्रोल डिजेलमा रोक लगाई ब्लैकमा तेल बेच्न सुरु गरेका छन |हालै बर्ढनी ईन्डियामा नेपाली नम्बर पेलेटका मोटरसाईकल हरूलाई पैट्रोल डिजेलमा रोक लगाएका छन| तेल को लाईनमा बस्दै नेपाली जन्ताहरू - भारतीय जनताबाट तेलको तस्कर र कालो बजारीसुरु भएको छ |

 
Photo: Sagar Thapa

Photo: Sagar Thapa

राष्ट्रपति दाबी गर्न ढोका खुला'-दाहाल

काठमाडौं: एमाओवादी अध्यक्ष पुष्पकमल दाहालले बहुमतीय प्रक्रियाबाट प्रधानमन्त्री निर्वाचित हुने अवस्था आएपछि आफ्नो पार्टीका लागि राष्ट्रपति दाबी गर्न ढोका खुलेको बताएका छन्। 

 

एमाओवादी संसदीय दलको शनिबार साँझ सिंहदरबारमा बसेको बैठकमा उनले कांग्रेसले सहमतीय राजनीति तोडेका कारण राष्ट्रपतिमा दाबी गर्न आफ्नो पार्टीका लागि ढोका खुलेको जानकारी गराएका हुन्।

 

कांग्रेसले पहिले भएको सहमति उल्लंघन गरी कोइरालालाई उम्मेदवार बनाएपछि आफूहरूले ओलीलाई राजनीतिक इमानदारी प्रदर्शन गर्न पनि समर्थन गर्नुपरेको उनले बताए। व्यवस्थापिका संसद्मा आइतबार हुने प्रधानमन्त्री निर्वाचनमा कांग्रेस सभापति सुशील कोइराला र एमाले अध्यक्ष केपी ओली प्रतिस्पर्धी छन्। 

 

ओलीको प्रस्तावकमा दाहाल स्वयं छन्।बैठकमा केही सभासद्ले राष्ट्रपतिका विषयमा तत्काल नबोल्नुपर्ने सल्लाह दिएका थिए । आफूले कांग्रेस सभापति सुशील कोइरालालाई प्रधानमन्त्रीको उम्मेदवारी बनेर गम्भीर गल्ती गरेको बताएको जानकारी पनि दाहालले गराएका थिए। 

 

'तपाईंले प्रधानमन्त्रीमा उम्मेदवारी दिएर गल्ती गर्नुभयो। सहमतीय राजनीतिलाई तोड्नु हुँदैनथ्यो,' आफूले कोइरालालाई दिएको सुझाव उद्धृत गर्दै दाहालले बैठकमा भने। 

 

कांग्रेस, एमाले, एमाओवादी र मधेसी जनअधिकार फोरम लोकतान्त्रिकबीच भएको १६ बुँदे सहमतिमा संविधानसभाबाट संविधान घोषणा भएलगत्तै कोइरालाले राजीनामा दिने र ओली प्रधानमन्त्री हुने भद्र सहमति भएको पनि दाहालले स्मरण गराएका थिए। प्रधानमन्त्रीमा उम्मेदवारी दिएपछि कोइरालाले संसद्भवन बानेश्वरमा दाहाललाई भेटेर आफ्नो पक्षमा मत दिन आग्रह गरेका थिए।

 

कांग्रेस भारतीयहरूको चलखेलमा परेको पनि दाहालले बैठकमा बताएका थिए। उनले आफ्ना सभासद्लाई आइतबार संसद्मा डेढ घन्टा अघि नै पुगेर ओलीको पक्षमा मतदान गर्न निर्देशन दिएका छन्। 

 

ओलीलाई प्रचलित कानुन, पार्टी विधान तथा व्यवस्थापिका संसद्को नियमावलीबमोजिम अनिवार्य मतदान गर्न सम्पूर्ण सभासद्हरूलाई ह्विप जारी गरिएको प्रमुख सचेतक गिरिराजमणि पोखरेलले बताए।ओलीका पक्षमा मतदान गर्ने एमाओवादीको निर्णयप्रति पार्टी परित्याग गरेका वरिष्ठ नेता डा. बाबुराम भट्टराई पक्षका नेताहरूले असहमति जनाएका छन्। 

 

संसदीय दलको बैठकमा भट्टराई पक्षका नेता प्रभु साहले आफू पार्टीको निर्णय मान्न तयार रहे पनि निर्णयप्रति आफ्नो फरक मत रहेको बताए। 'म पार्टीको निर्णय मान्छु तर पार्टीको बैठकमा मैले मेरो नोट अफ डिसेन्ट पेस गरेको छु,' साहले अन्नपूर्णसँग भने।

 

भट्टराईले आफू पक्षका नेताहरूलाई शनिबार आफ्नै निवास सानेपामा बोलाएर ओलीलाई समर्थन गर्ने एमाओवादीको निर्णय गलत भएको भन्दै त्यसको विपक्षमा उत्रन नेताहरूलाई आग्रह गरेका थिए। 

बिहान सात बजेदेखि तीन बजेसम्म बसेको भट्टराई पक्षधर नेताहरूको बैठकले ओली मुलुकलाई सही दिशा दिन सक्ने लायक नेता नरहेको ठहर गरेको थियो। बैठकमा सहभागी नेता रामरिझन यादवले भने, ‘स्थायी समिति बैठकमा देवेन्द्र पौडेलजीले ओलीलाई निःर्सत प्रधानमन्त्रीमा समर्थन गर्ने पार्टीको निर्णयमा नोट अफ डिसेन्ट पेस गर्नुभएको थियो, त्यसैका आधारमा हामीले विरोध जनाएका हौं।'

 

दाहाल निवास लाजिम्पाटमा शनिबार बिहान बसेको स्थायी समिति बैठकमा भट्टराई पक्षका नेता मानिँदै आएका टोपबहादुर रायमाझीले ओलीका पक्षमा मतदान गर्ने निर्णयमा सहमति जनाएका थिए भने अर्का नेता देवेन्द्र पौडेलले नोट अफ डिसेन्ट लेखेका थिए।

 

'देशको विद्यमान परिस्थितिको जिम्मेवारपूर्ण रूपमा हल गर्ने पहलकदमी लिनुको साटो निःसर्त एमालेलाई समर्थन गर्ने निर्णयले देश झनै दलदलमा फस्ने खतरा रहेको हुँदा हाम्रो जस्ता शान्तिप्रक्रियाको महत्वपूर्ण हिस्सा रहेको जिम्मेवार पार्टीको यस्तो गलत र गैरजिम्मेवार निर्णयप्रति हाम्रो विमति रहेको जानकारी गराउन चाहन्छौं,' पौडेलसहित २९ जना केन्द्रीय सदस्यको सूची रहेको प्रेसविज्ञप्तिमा उल्लेख छ।

 

पौडेल, हिसिला यमी, नवराज सुवेदी, गंगा श्रेष्ठ, महेन्द्र पासवान, खिमलाल देवकोटा, कुमार पौडेल, देवी खड्का, रामचन्द्र झा, रामरिझन यादव र रामकुमार शर्माले मात्र हस्ताक्षर गरेको विज्ञप्तिमा भनिएको छ, ‘कयौ आफ्ना जायज मागसहित आन्दोलनमा रहेका पक्षहरूलाई वार्तामा ल्याउने वातावरण बनाउन लाग्नुपर्ने, सम्पूर्ण नेपालीहरू मिलेर पुनर्निर्माणमा लाग्नुपर्ने कैयौं बाँकी रहेका शान्तिप्रक्रियाका विषयहरूलाई पूरा गर्नुपर्ने, चाडपर्वहरूको पूर्वसन्ध्यामा उपभोग्य वस्तुहरूको सहज आपूर्तिका लागि पहल गर्नुपर्ने, स्वाधीनताको भावनासहितका सम्पूर्ण नेपालीलाई आन्तरिक रूपमा गोलबन्द गरेर देशको विद्यमान समस्याको समाधान गर्ने, राष्ट्रिय एकता र सार्वभौमसत्ता रक्षाका लागि राष्ट्रिय सहमति कायम गरेर जानुपर्ने अवस्थामा यो निर्णयले हामीलाई गम्भीर र आश्चर्य चकित बनाएको छ।'

 

एमाले अध्यक्ष ओली र एमाओवादी अध्यक्ष दाहालबीच सरकार निर्माणका लागि शनिबार भएको १४ बुँदे सहमतिमा नेपालले सामाना गर्नुपरेको अघोषित नाकाबन्दी र यसको परिणामलाई ध्यान दिई तत्कालिक र दीर्घकालीन रूपमा अत्यावश्यक वस्तुको आपूर्ति गर्न र राष्ट्रलाई आत्मनिर्भर बनाउन योजनाबद्ध नीति र कार्यक्रम तर्जुमा गरी लागू गर्ने उल्लेख छ। 

 

दुईपक्षीय र बहुपक्षीय अन्तर्राष्ट्रिय सन्धिसम्झौता र अभिसन्धिअनुरूप नेपालले प्राप्त गर्ने पारवहन तथा व्यापार वाणिज्य अधिकार सुनिश्चित गर्दै तिनको पूर्ण र सहज उपभोगको दिशामा क्रियाशील रहने, नेपाली जनताद्वारा निर्वाचित सार्वभौम संविधानसभा र नेपालका राजनीतिक दलहरूले गरेका संविधान जारी गर्नेलगायतका निर्णयको सम्मान गर्न तथा नेपालले सामाना गरिरहेको अघोषित नाकाबन्दीको अन्त्य गरी भूपरिवेष्टित राष्ट्रले अन्तर्राष्ट्रिय कानुनबमोजिम उपभोग गर्न पाउने पारवहन अधिकार निर्बाध रूपमा उपयोग गर्ने स्थिति सुनिश्चित गर्न र दुई छिमेकी मित्र राष्ट्रबीचको सम्बन्धलाई सहज बनाउन मित्र राष्ट्रसँग आग्रह गर्ने पनि सहमतिमा उल्लेख छ।

 

असन्तुष्ट आन्दोलनरत तराईमधेस केन्द्रित दलहरू थारू समुदाय र विभिन्न रूपमा आफ्ना मुद्दा र आवाज उठाइरहेका आदिवासी जनजातिलगायत अन्य उत्पीडित समुदायसँग वार्तामार्फत समस्याको राजनीतिक सम्बोधन गरी समाधान गर्ने, वार्ता र सहमतिका माध्यमबाट संविधानमा आवश्यकताअनुसार संशोधन गर्ने सहमति पनि ओली र दाहालबीच भएको छ।

चर्को विवादबीच कोइराला

काठमाडौं: कांग्रेसले उम्मेदवारी दिने वा नदिने भन्ने चर्को विवादका बीच पार्टी सभापति एवं प्रधानमन्त्री सुशील कोइरालालाई फेरि प्रधानमन्त्रीको उम्मेदवार बनाएको छ। 

 

बुधबारदेखि लगातार तीन दिनसम्म चलेको केन्द्रीय कार्य समितिले निर्णय गर्न नसकेपछि प्रधानमन्त्रीको उम्मेदवारी दिने दिन शनिबार बिहान कोइरालाले वरिष्ठ नेता शेरबहादुर देउवा र उपसभापति रामचन्द्र पौडेललाई बोलाएर आफैं उम्मेदवार हुने निर्णय सुनाएका हुन्।बालुवाटार उच्च स्रोतका अनुसार कोइरालाले पार्टीबाट नयाँ उम्मेदवार बनाउँदा विधानअनुसार दलको नेता हुनुपर्ने भएकाले समय अभावमा आफैं हुनुपर्ने अवस्था आएको बताएका थिए। 

 

'असोज २०, २१ र २२ गते बसेको कांग्रेस केन्द्रीय कार्यसमितिको बैठकले पार्टीको नेतृत्वमा अधिकतम बहुमतीय सरकार निर्माण गर्ने सन्दर्भमा गम्भीर छलफल र रायसुझावसहित पार्टी सभापति सुशील कोइराला, वरिष्ठ नेता शेरबहादुर देउवा र उपसभापति रामचन्द्र पौडेललाई जिम्मा दिएअनुसार संविधानको धारा २९८ को उपधारा ३ बमोजिम प्रधानमन्त्री पदका लागि यही असोज २४ गते सम्पन्न हुने निर्वाचनमा कांग्रेसका तर्फबाट पार्टी सभापति एवं संसदीय दलका नेता सुशील कोइरालालाई उम्मेदवार बनाउने सर्वसम्मत निर्णय गरियो,’ कांग्रेसद्वारा जारी विज्ञप्तिमा उल्लेख छ।

 

स्रोतका अनुसार कोइरालाले आफू प्रधानमन्त्री निर्वाचित हुने निश्चित रहेको भन्दै देउवा र पौडेललाई मनाएका थिए। शनिबार बिहान कोइराला, देउवा र पौडेलबीच सहमति भएपछि केन्द्रीय समितिले औपचारिक रूपमा उम्मेदवारको निर्णय गरेको हो। 

 

कोइरालालाई मधेसवादी दलहरूले सहयोग गर्ने प्रतिबद्धता जनाएको स्रोतले बतायो।कांग्रेस प्रवक्ता दिलेन्द्रप्रसाद बडूले शनिबार साँझ अपिल जारी गरी कोइरालाका पक्षमा मतदान गर्न सबै दललाई आग्रह गरेका छन्। 

 

अपिलमा वर्तमान समयमा मुलुकमा देखापरेको राजनीतिक ध्रुवीकरणले यथार्थमा राष्ट्र र समाजको तत्कालीन र दीर्घकालीन हित हुन नसक्ने भन्दै विनाशकारी भूकम्पबाट क्षतिग्रस्त संरचनाहरूको पुनर्निर्माण र नवनिर्माणको चुनौतीपूर्ण कार्य सम्पन्न गर्नका निमित्त देशमा राजनीतिक स्थिरता र दिगो शान्ति कायम गर्न पनि कोइरालाकै नेतृत्वमा सरकार आवश्यक भएको उल्लेख छ।

 

सहमहामन्त्री खड्काद्वारा राजीनामा

तीन दलबीचको एकता तोडेर पार्टी सभापति आफैं उम्मेदवार बन्ने निर्णयप्रति असहमति राख्दै कांग्रेस सहमहामन्त्री पूर्णबहादुर खड्काले आफ्नो पदबाट राजीनामा गरेका छन्। 

 

उनले यसअघि बसेको केन्द्रीय समिति बैठकमा पनि तीन दलबीचको एकता तोड्न नहुने भन्दै एमाले अध्यक्ष केपी ओलीलाई समर्थन गर्नुपर्ने अडान राख्दै आएका थिए।

 

उनले नेतृत्वप्रति असन्तुष्टि जनाउँदै सभापतिले मनोनयन गरेको पदबाट राजीनामा गरेका हुन्। यद्यपि उनले केन्द्रीय सदस्यबाट भने राजीनामा गरेका छैनन्। 

खड्काले संविधान जारी भएपछि राजीनामा गर्छु भन्ने सार्वजनिक प्रतिबद्धता गरेको व्यक्तिले फेरि उम्मेदवारी दिने निर्णय गर्नुले १६ बुँदे सहमति तोड्दै दलहरूबीचको संविधान निर्माणको सहमति भत्कने भन्दै गम्भीर असहमति राखेका थिए। 

 

'जसले मलाई सहमहामन्त्री मनोनीत गर्‍यो ऊसँग मेरो मौलिक असहमति भएकाले मैले राजीनामा गरेको हुँ,' खड्काले अन्नपूर्णसँग भने। 

 

उनले कोइरालाले फेरि प्रधानमन्त्रीको उम्मेदवार हुनु एक सय एक प्रतिशत गलत भएको बताउँदै आमकार्यकर्ता र जनता नै बेखुसी हुनेगरी आएको निर्णयको विरोध गरेका हुन्। उनले अब राजनीतिले गम्भीर मोड लिएको पनि बताए।

 

कालोसूचीमा नपर्नुहोस्: ओली

बालकुमार नेपाल

काठमाडौं: एमाले अध्यक्ष केपी ओलीले प्रमुख दलहरूबीच भएको सहमतिबाट पछि हटेर कालोसूचीमा नपर्न प्रधानमन्त्री एवं कांग्रेस सभापति सुशील कोइरालालाई आग्रह गरेका छन्। 

 

संसद्‌भवन नयाँबानेश्वरमा बसेको पार्टी संसदीय दलको बैठकमा बोल्दै ओलीले यसबारे जानकारी दिएका हुन्।

 

‘मैले बैठकलाई सम्बोधन गर्नुभन्दा केही समयअगाडि प्रधानमन्त्री कोइरालाको फोन आयो, फोनमा उहाँले कांग्रेसका दुई नेताले प्रधानमन्त्रीमा उम्मेदवारी दिन निर्णय गरेकाले आफूले उम्मेदवारी दिने सुनाउनुभयो। 

 

जबाफमा मैले त्यसो नगर्नुस्, त्यसो गर्नुभयो भने कांग्रेसमा मात्र होइन जनताको मन मनमा तपाईं कालोसूचीमा पर्नुहुन्छ भने,'ओलीलाई उद्धृत गर्दै एमाले केन्द्रीय सदस्य एवं सांसद यज्ञराज सुनुवारले भने।

 

ओलीले विगतमा भएको ७ बुँदे र १६ बुँदे सहमतिको ख्याल गर्न र संविधान कार्यान्वयनको चुनौतीलाई सामना गर्न पनि सहकार्य आवश्यक भएको बताएका थिए।

 

'विगतमा सुशील कोइरालालाई प्रधानमन्त्री बनाउँदा म आफू प्रस्तावक बसेको थिएँ, अहिले त्यो जिम्मेवारी अब तपाईंले निर्वाह गर्नुपर्छ,’ कोइरालालाई ओलीले भनेका थिए। 

म्याग्दीमा नुन खानी छ, सरकारले कानमा तेल हाल्या छ

बेनी : म्याग्दीको शिख गाविसको कालीगण्डकी नदी किनारमा चार वर्षअघि फेला परेको नुन खानी सरकारी बेवास्ताका कारण अलपत्र परेको छ ।

अन्नपूर्ण संरक्षण क्षेत्र आयोजनाअन्तर्गत पर्ने शिख र नारच्याङ गाविसको सिमानामा कालीगण्डकी नदी किनारामा २०६८ सालमा नुनिलो पानीको मुहान भेटिएको थियो ।

मुहान भेटिएपछि त्यसको अनुसन्धान सुरु गरे पनि आर्थिक अभावमा पूर्णता पाउन नसकेको तातोपानी संरक्षण समितिका सदस्य पूर्णबहादुर पुनले बताए ।

'तातोपानीसँगै नुनसमेत देखिएको छ', उनले भने, 'पानीको स्वाद नुन हालेको जस्तो भएकाले पनि खानी तथा भूगर्भ विभागमार्फत अनुसन्धान गर्नुपर्ने आवश्यकता देखिएको छ ।'

करिब ५० डिग्री सेल्सियस तापक्रममा नुनिलो पानीको मुहान तथा आसपासको जग्गामा सेताम्मे नुन जस्तै पदार्थ देखिएको थियो ।

नुनखानी भेटिएका चार वर्ष भइसक्दा पनि सरकारले बेवास्ता गरेको स्थानीयबासीले अारोप लगाएका छन् ।

कालीगण्डकी नदीको किनारमा फेला परेको तातोपानीलाई संरक्षणका लागि डोजरले स्नान कुण्ड बनाउने क्रममा नुनको खानी फेला परेको स्थानीय समाजसेवी चन्द्रबहादुर पाइजाले जानकारी दिए।

सो खानीको उत्खनन हुन सकेमा जिल्लाका लागि आवश्यक पर्ने नुन प्राप्त गर्न सकिने अनुमान गरिएको उनको भनाइ रहेको छ । 'उत्खननका लागि नमुना पठाइसकेका छाैं, उनले भने ।

नुनखानी उत्खनन गर्न आवश्यक सहयोगका लागि स्थानीयवासीले सरोकारवालासँग सहयोग मागेपछि स्थलगत अवलोकनमा गएको एक टोलीले अन्य क्षेत्रको तातोपानीभन्दा स्वाद फरक रहेकाले यसको अनुसन्धान हुनुपर्ने बताएका थिए ।